قار (برف) - شعری آذری از شاعری بنام از خطهء سر سبز اردبیل آقای عاصم اردبیلی
قار
آغارتین تورپاغین قارا اوزونو
بیر دونیا گوزه للیک گوردوم سنده قار!
آمما بیر دفعه لیک دوشدون گوزومدن
قوردلار دولوشاندا، بیزیم کنده، قار
دئدین: من اولماسام، شانلی یاز اولماز
گوللرده یاشیل باش اوردک – غاز اولماز
سولار شاققیلدایب کور، آراز اولماز
بو سوزه ایناندیم نئیلیم منده قار
سن بو ایناملان یاغدین داغلارا
اوز گتدی قارقالار سولغون باغلارا
بئش گونلوک قارانی قوشدون آغلارا
گونشده هله لیک قالدی چنده، قار!
کیمی سی داغلاردا تپدی بوزونو
چوخون شاختا ووردو یولار اوزونو
قورییان اولمادی قویون قوزونو
آنجاق دییه بیللم سن گلنده قار!
چلچراغلی بیر ساراییا
یاز یئتیشیب قیش چاغیندا
قوچ کلله سی آسیلیپدیر
آلوو ساچان اوجاغیندا
گوزه ل بالا خومارلانیر
آناسی نین قوجاغیندا
دورد بیر یاندان ده ییر گوزه
قیش میوه سی تاباق تاباق
فریزرده، یاز نوباری
آنبار اولوب آیلار قاباق
لیوانلاردا بال شربتی
بشقابلاردا اردکک اتی
اونو گوتور، بونو گتیر
میز باشیندان امریه لر
صادر اولور دونه – دونه
اولو ارباب طرفیندان
بیر آغ بیرچک قوللووچییا
آرتیراراق منظره نی
قاردا دوویر پنجره نی
رخصت ایستر ائوه گلسین
قارانقولوق بیر داخمادا
اوسارایین ساغ تایندا
سرطایین غده سی تک
زوغ سالاراق مرمر داشا
دورد دووارین آرایسندا
پناه وئریب اون بیر باشا
آنجاقکی بیر جانسیز ایشیق
او داخمانین باجا سیندان
وورور گوزه واریق ایزین
"ایندی کیشی گلر " دییه
بویلاناراق پنجره دن
یازیق قادین چوله لاخیر
نفس چکیر، آغیر – آغیر
گوزلریندن دامجی – دامجی
اوره ک قانی اوزه آخیر
بوز باغلاییر یاناغیندا
کورپه اوشاق قوجاغیندا
پیچیلداییر قولاغینا
آنا آجام، آنا آجام!....
میز باشیندا قاشیق سسی
ویدیوئون شن نغمه سی
بیر بیرینه قاریشاراق
بدیعی بیر سمفونودان
سارای ایچره خبر وئریر
استکانلار قالخیر گویه:
((ووراق شرف ساغلیغینا
ووراق هدف ساغلیغینا
شاد یاشاسین بیزیم ائللر
عمو مور سورسون اوزون ایللر
صونا بولبول ساغلیغینا
عطیرلی گول ساغلیغینا
باغوان اولوب گول بیتیرک
آیری تاپاق، باهم ییه ک
ایچک، بیلک، ایتیر میه ک
خومار گوزلر ساغلیغینا
شیرین سوزلر ساغلیغینا!....))
ایستکانلار انیر یئره.
(( ایندی گلر آتان ، بالا
گئدیب سنه قاققا آلا
بیر آزجا یات، دان اولدوزوم
دینجینی آل، املیک قوزوم
سنه قوربان یورغون جانیم
دامار ایچره گزه ن قانیم))
دییه، سالیر کورپه سینی
قیچی اوستده جاسیز قادین
ییر قالاییر بالاسینی
حزین حزین لای لای چالیر
اوخشیاراق دردین آلیر
دیل دانیشیر، اوره ک یانیر
قفسده کی بولبول کیمین
هی چوبالیر، هی چوبالیر
مین بیر خیال هجوم چکیر
سالیر گیره بیر آنانی
اوره یینده اوزور، دوزور
قولاقلاری داری ده لیر
انتظارین هر لحظه سی
دئمک اونا بیر ایل گلیر
اللرینی هو – هوراراق
بویوک اوغلان گلیر دیله
آنا – آتام چوخ یوبانیب
((گلر اوغلوم ))آنا دئییر
گوزلرینی سیله سیله
انسانیت گول ائیله ییب
سارای ایچره، میز باشیندا
شادلیق قوشو یئرین سالیب
جماعتین گوز قاشیندا
بیر طرفده گوزه تله ییر
قوناقلاری مانقال ماشا
اولو ارباب میز باشینی
ترک ائله ییر آشا – آشا
بویوک اوغلان ال چالاراق
دئییر: ((آتا اوزون یاشا))
قوناقلارین بیری دئییر
آتاندیر: اصلان پاشا
او اصلان کی زامان اونون
وورمیاجاق ((اوخون داشا))
اوغول دئییر ((سنده یاشا!))
دئییم آنجاق بیر لحظه ده
اصلان آلیر گرزالینه
اوره کدن بیر نفس وورور
تکان وئریر هیکلینه
ایشچی لری سالیریادا
غم توستوسون دادا – دادا
دئییر: ((یورودم گئتدی بادا
گوروم ائله گلن قادا
ظلمکاری جاندان سالا
ظلمات گئده ایشیق قالا
روزگارین یامانلیقی
سالیب بیزی حالدان حالا
داردا قالیب یازیق ائلیم
یوردوم اولوب دیلیم – دیلیم
نه جور دئییم نه جور گولوم!))
آه چکه ره ک قان توپورور
ائشیکده ده ایتلر هورور
داخماداکی گوزلر یاتیب
اویاق قالیب آناگوزو
گاه اوخیور گاه توخیور
اوره یینده مین بیر سوزو
دئییر: (( فلک قارقیانین
هاردان اولار گولر اوزو!))
قوجاقلاییب باغداشینی
گوزه تله ییر سیر داشینی
اونون آجی خیاللارین
بیردن پوزور ایتلر سسی
انتظارین باشا وورور
ارین ائوه یتیشمه سی
((بس هارداسان)) دییه، کیشی
قاچیر، چیرپیر اوستون باشین
سورگونونه چاتان کیمین
اییلیر اونون گورون – قاشین
ایتیر دیگین تاپان کیمین
اوزگولنده، گوز آغلاییر
دانیشاندا، سوز آغلاییر
آه چکه رک یازیق کیشی
((آنجاق دئییم)) گلیر دیله
((هارام واردور هاراگئدهم))
بوجور عومور سور مگیمدن
یاخشی دیرکی گوراگئده م
آلا توردان توکور منیم
شیدیر قاما قارا باشیما
گونده فلک بیر جور قاتیر
سویوق سویو ، داغ آشیما
بیز حیاتین اوجاغی نین
یاریمادیق ایستی سیندن
گوزوموزو آچان گوندن
کور المو شوق توستو سوندن
کرمووه قوربان، تاری!
بیر آزادا باخ، بیزه ساری
اولدوزومون یوخ چیخاری
آج تویوخ تک خیردا بالام
یوخوسوندا گورور داری
اودا اونون یاز نوباری
بیز آشاقا سن یوخاری
زحمتی مین حاصلینی
بیگ آپاری، خان آپاری
جان صاحبی سن اولالی
ظالم بیزدن جان آپاری
ایلیشدیریب چنگلینی
دامارلاردان قان آپاری))
((کیشی کیفیر دئمه اوتان
چوخ توت ئتمه، بیر آز دایان
نه اولوبدور بوگون سنه
جریانی سئویله منه))
آجیخلانیر آرواد اونا
آغ بیرچگین یونا – یونا
کیشی باخیر ساغا سولا
گوز کاساسی دولا – دولا
اوشاقلارین یاتمیش گورور
غم غصه یه باتیمش گورور
ال ائیله ییر جیب لری نین
چکیر چوله آستارینی
دئییر: آرواد بوبوش جیبلر
دویورمه یور آج قارینی
قویاق چوخلو یوبانمیشام
یاتمیشسامدا، اویانمیشام
آلا توردان آخشاماجان
انتظاردا دایانمیشام
ارباب کیمین ایشله مه ییب
منده غصه قازانمیشام
اوز ائویمه قایتماغا
بوش الیلن اوتانمیشام
سازاق ده ییب لوت بدنه
نئجه دئییم ارواد سنه
قارین اوزو قارا اولوسون
بوکوب منی آغ کفنه
قارکی بو ایل بوجور توتوب
ایشیم قالدی یاز گلنه
دونموش گوله غاز گلنه))
دردلر آغیردی چکنی جانسیز
فلکده یاغدیریر قارین آمانسیز
نه قدر قالماییب اوخلار کامانسیز
کاماندان چیخان اوخ یوخسولر توشلار.
میزلرین باشیندا دئییلن سوزو،
چاخیرین حکمیلن آغلاغان گوزو.
مانقال قیراغیندا گولمیه ن اوزو.
اوزونو زامانا ساتانلار خوشلار
ائلدن گئری گزیب، دانیشان ائلدن،
چتین باش چیخاردا، سینیق کونولدن
قابارسیز الیلن پینه لی الدن
سوز دییه ن سوزویلن ائلین قیلیشلار
عاشیق نئجه کوکلر اولجه تارین
طبیعت گر کدیر یاغدیرسین قارین
یاغماسا بیتیرمز یازین نوبارین
بورومز چوللری الوان ناخیشلار
یوخسوللوق دردینه قار بهانه دیر
ظلمکار قار دئییر پیس زمانه دیر
ساچلار پرشانسا، باعث شانه دیر
یوخسا، قان آغلاماز قاردا باخیشلار
آج قارین، اوزونده ایمان ساخلاماز
سئل گلسه قاباغین وریان ساخلاماز
((عاصم)) بلی قوربان ایران ساخلاماز
داغدا اصلان اولر، باغچادا قوشلار.
.jpg)
